Баруун бүсийн уралдааны шүдлэн насны уралдаанд 114 үрээ бүртгүүлсэн ч 40 гаруй нь хэмжилтэнд тэнцэж, уралдааны замд гарлаа.

Шүдлэн насны уралдаанд Өвөрхангай аймгийн Нарийнтээл сумын уяач Б.Ганбаярын хээр халзан түрүүлж, 100 жилийн наадмын анхны түрүүг авч наадамчин олноо баясгалаа. Айргийн хоёрт Увс аймгийн Давст сумын уяач Ц.Батбуянгийн шарга, гуравт Тэс сумын уугуул, аймгийн алдарт уяач Ц.Дамдин-Ядамын шарга, дөрөвт Дундговь аймгийн Эрдэнэдалай сумын уяач Л.Нямбаярын хонгор халзан, тавд Баруунтуруун сумын уугуул, Өмнөговь аймгийн Цогтцэций сумын харьяат, аймгийн алдарт уяач Г.Батнямын хүрэн хурдалж түүхт ойн баяр наадамд олон түмнээ баясгалаа.

Баруун бүсийн хурдан морины уралдаан өнөөдөр хязаалан, даага, сонгомол бага насны уралдаанаар боллоо. Баяр наадмын хоёр дахь өдөр буюу маргааш азарга, соёолон, их насны морьдын уралдаан болно. Харин наадмын сүүлийн өдөр буюу долоодугаар сарын 30-нд сонгомол дээд насны уралдаанаар өндөрлөнө.