Өмнөд Солонгосын тэргүүн хатагтай асан Ким Кён Хиг хувьцааны үнийн манипуляц хийхэд хамтарсан, сонгуульд хөндлөнгөөс оролцсон, хээл хахууль авсан хэрэгт холбогдуулан баривчилжээ.

Ингэснээр Ким Кён Хи болон түүний нөхөр, Ерөнхийлөгч асан Юн Сог Ёль нар нэгэн зэрэг баривчлагдаал байгаа юм.

Өнгөрсөн долоо хоногт Хөрөнгийн зах зээлийн тухай хууль, Улс төрийн сангийн тухай хууль болон зуучлах зорилгоор авлига авахтай тэмцэх тухай хуулийг зөрчсөн хэргээр тусгай прокурор Мин Жун Кигийн баг хүсэлт гаргасны дараа Сөүл хотын төв дүүргийн шүүх "Нотлох баримтыг устгаж болзошгүй" гэж үзэн Ким Кён Хиг мягмар гаргийн орой баривчлах тушаал гаргав.

Түүнийг баривчлахын өмнө буюу мягмар гарагт болсон хуралдааны үеэр тусгай прокурорууд нотлох баримтыг устгах эрсдэлтэй байгааг онцолсон бол өмгөөлөгчид нь "Мөрдөн байцаалтын явцад хамтран ажилласан, биеийн байдал нь тааруу байгаа" гэж мэдэгджээ.

Ким Кён Хи 2009-2012 онд Өмнөд Солонгос дахь BMW-ийн дилер “Deutsch Motors”-ын хувьцааны үнийг өөрчлөх хуйвалдаанд оролцсон, 2022 оны парламентын нөхөн сонгууль болон 2024 оны бүх нийтийн сонгуульд нэр дэвшигчдийг тодруулахад хөндлөнгөөс оролцсон гэжээ.

Мөн бизнесийн давуу тал олгосныхоо хариуд “Эв нэгдлийн сүм”-ээс нэгэн бөөгөөр дамжуулан тансаг бэлгүүд авсан хэргүүдэд буруутгагдаж байгаа юм.

Өнгөрсөн лхагва гарагт Ким Кён Хи тусгай прокурорын багт байцаалт өгөх үедээ уучлал хүсэж “Би бол хүмүүсийн санааг зовоосон хэн ч биш нэгэн” гэжээ. Харин мөрдөн байцаалтын үеэр өөрийг нь буруутгаж буй бүх хэргийг няцаасан байна.