Тэтгэврийн зээлтэй холбоотой асуудлаар ахмадуудын төлөөлөл мэдээлэл хийлээ.

Ахмадуудын төлөөлөл:

-Тэтгэврийн доод хэмжээг 1.5 сая төгрөг болгож өгөх хэрэгтэй. УИХ-ын гишүүн А.Ариунзаяа өөрөө өндөр цалин хангамжтай хэрнээ 500-600 мянган  төгрөгийн тэтгэмжтэй ахмадуудыг хоёр гурван сар хүлээж хуримтлал үүсгэ гэж тулгаж байгаад хариулт хүсэж байна. Харин Эрчим хүчний сайд Б.Чойжилсүрэн 2016 онд ахмадуудын Хамтын тэтгэврийн тухай хуулийг дэмжихийн оронд үгүйсгэж байсан. Ахмадын хамтын тэтгэврийн хуульд өөрчлөлт оруулах ёстой. Тухайлбал, 20 жил хамт амьдарсан биш үлдсэн нэгэнд нь тэтгэвэр олгохыг хүсэж байна.  1990 оноос хойш зах зээлийн хүнд шуурганд хэдэн гэр бүл салж, хэдэн хүүхэд өнчирч, гудамж талбайд хаягдсан гэдгийг бодож үзэх хэрэгтэй.

Монгол Улсын Ерөнхий сайд арилжааны банкуудад чиглэл өгч тэтгэврийн зээлийн 50, 50 хувийг хүчингүй болгосон. Шийдвэр гаргасан өдрийн дараа арилжааны банкууд 24 сараар 100 хувь тэтгэврийн зээлийг олгосон. Гэвч энэ нь түр хугацааны асуудал байжээ. Тодруулбал, долдугаар сарын 11-ний өдрөөс Хаан банк 100 хувь, Төрийн банк арванхоёрдугаар сард 100 хувь,  Худалдаа хөгжлийн банк, Төрийн банкууд дур мэдэн хугацаа заасан.

Арилжааны дөрвөн банкинд шаардлага хүргүүлсэн боловч Голомт банк долдугаар сарын 24-ний өдөр зээлийн сарын хугацааг 18 сар буюу 70 хувь болгосон. Гэр бүл, хөдөлмөр, нийгмийн хамгааллын яамнаас арилжааны банкуудад тэтгэврийн орлого барьцаалсан зээлийн хэмжээ хугацаанд өөрчлөлт оруулахгүй байх, зээлийг хүндрэл чирэгдэлгүй олгодог байх албан бичиг хүргүүлсэн боловч Голомт банк үл тоосон хариу өгсөн.

Түүнчлэн энэ сарын 7-ны өдөр Төрийн банк шийдвэр гаргаж тэтгэврийн зээлийг зургаан сараар олгодог болох шийдвэр гаргажээ.

18 сараар тэтгэврийн зээлээ авсан ахмад настнууд ямар ч орлого байхгүй хэцүү нөхцөл байдалд хүрсэн.  Монголбанк бодлогын хүүг өндөр түвшинд барьсан бөгөөд арилжааны банкууд алдаа гаргасан гэдгээ хүлээн зөвшөөрч байна.

Арилжааны банкууд хүү дээр давхар хүү бодож зөрчлийг торгууль мэтээр тооцож ахмадуудыг мөлжиж байна. Арилжааны банкууд 18-19  хувийн хүүтэй зээл олгож зээлийн хүүдээ дахин хүү бодож байгаа нь хууль зөрчсөн үйлдэл юм. Монголбанк Монголын ард түмний талд биш хэдэн арилжааны банкны талд үйлчилж байна.

Тэтгэврийн зээлийн хүүд давхар хүү бодохыг таслан зогсоох хэрэгтэй. Тэтгэврийн зээлийн хүүг 12 хувиас хэтрүүлэхгүй байхаар хуульчилж өгөх шаардлагатай байна.

Албаныхан тэтгэврийн зээл хэвийн олгогдож байгаа мэтээр мэдээлэл өгч байгаа нь бодит байдал дээр хэрэгжихгүй байна.

Бидний шаардлага бол:

• Тэтгэврийн доод хэмжээг 1.5 сая төгрөг болгох,
• Тэтгэврийн зээлийн хүүг 12 хувь хүртэл бууруулах,
• Зээлийн хугацааг 36 сар болгох ба 35 сараар зээл авсан бол үлдсэн нэг сарыг олгодог байх
• Давхар өндөр хүү бодохгүй байх

Тэтгэврийн зээлийг хэрэглээний зээлд оруулах бус онцгой зээлд оруулах хууль баталж өгөх хэрэгтэй. Үүнийг хийх үүрэг нь УИХ-ын дарга Д.Амарбаясгаланд бий. Монголбанк, арилжааны банкууд болон холбогдох хүмүүс хуульд заасан чиг үүргээ биелүүлэхгүй, зөрчиж байна.

Иймд Монголбанкны Ерөнхийлөгч Б.Лхагвасүрэн, Төрийн банкны захирал болон холбогдох хүмүүсийг албан үүргээс нь чөлөөлөхийг шаардаж байна гэлээ.