Манай нийгэмд нүүрлэсэн ёс зүй, хүн чанарын ялзрал доройтлын нэг ноцтой хэлбэр нь эцэг хүн байх үүрэг хариуцлагаас зугтаж өөрсдийгөө чөлөөлсөн хүмүүсийн бүхэл бүтэн "арми" бий болсон явдал юм. Аав хүн байна гэдэг биологийн ойлголтоос гадна үүрэг хариуцлагын нэр.

Амьдралд алдаж хань нөхөр, хайрт гэргийтэйгээ үл ойлголцон зам замаа хөөсөн байж болно. Гэвч энэ нь эхнэр нөхрийн хоорондын асуудлаас хальж, үр хүүхдүүдийнх нь ирээдүйг сааралтуулж, сэтгэлд нь гүн шарх үлдээх хамгийн том, аюултай хүчин зүйл билээ.Салсныхаа дараа эрчүүд бүхнээс "чөлөөлөгдсөн" мэт дур зоргоор авирлаж, үр хүүхдээ ч танихгүй мэт амьдарч байгаа нь хүний ёсонд байж боломгүй зүйл. 

Амьтан хүртэл үр зулзагаа эргэж тойрдог байхад эцэг нь атлаа танихгүй хүн шиг явж чадаж байна гэдэг харгислал, хязгааргүй тэнэглэл. Аав нь амьд байсаар байтал хүүхдүүд нь эцгийн хайр халамжийг бусдын ярианаас л сонсож өсөж байна. Хааяа гудамжинд тааралдсан ч танихгүй хүн шиг зөрөх эцэг нь хүүхдийнхээ сэтгэл зүйд нөхөж баршгүй хоосон орон зай үлдээж байна. Хүний амьдралд алдаж онох, салж хагацах зүйл тохиолдож болно. Гэхдээ хүүхэд гэдэг тэр хоёр хүний амьдралын үргэлжлэл, тэдэнд ямар ч буруу байхгүй.

Эцэг хүний үүрэг нь хүүхдээ тэжээж өсгөхөөс гадна сэтгэл зүрхээрээ дэргэд нь хамт байж, зөв үлгэр дуурайлал үзүүлэх явдал байдаг. Салсан ч аав хэвээрээ байх нь хүний мөс, хүн чанарын шалгуур юм. 

Өнөөдөр зарим аавууд үүрэг хариуцлагаасаа зугтаж, "өөрийн амьдралаа хөөнө" хэмээн өөрийгөө зөвтгөж яваа ч хүүхдүүд нь эцгийн хайрыг мэдрэхгүй өсөж байна. Энэ бол эцэг хүний хувьд хамгийн золгүй хувь тавилан. Харамсалтай нь нийгэм даяараа үүнийг хэвийн зүйл мэт хүлээж авах болжээ. 

"Салчихаж болдог юм, яадаг юм" гэсэн хувиа хичээх үзэл газар авч, амьдралыг азгүй тоглоом болгож хувиргасан олон залуус архи, тамхиар хань хийх болж. Мөн зугаацаж, улам бүр алдаж, хөнгөн хийсвэр амьдарч, үр хүүхдүүдээ хохироосоор байгаа жишээ олон бий. Эмэгтэйчүүд дэндүү их ачааг нуруун дээрээ үүрч байна. Хаяад явсан эцгүүд нь халтар хэдэн цаас харамлаж, сүүлээ хавчин одоцгоох нь нүд халтирам дүр зураг. Энэ бүхний тусгал нь архичин, тамхичин, танхай балмад өсвөр насны хүүхдүүд.

Эр хүний хийморь сүлд нь ажил, амжилтаар хэмжигддэггүй. Харин гэр бүл, үр хүүхдүүдийнх нь элэг бүтэн, аз жаргалтай амьдралаар хэмжигддэг. Салсан ч үр хүүхдүүдээ нүдэн балай, чихэн дүлий орхиод явж арай болохгүй ээ. Та хоёрын харилцаа дууссан байж болох ч, аав-охин, аав-хүүгийн холбоо хэзээ ч тасардаггүй гэдгийг үргэлж санаж яваарай.

Хүн шиг хүн байна гэдэг амаргүй, гэхдээ эцэг шиг эцэг байх боломж хүн бүрт бий шүү...

                                                                             "Черри медиа групп"-ийн  сэтгүүлч Ц.Энхтайван