Монголчууд олимпын наадмаас алтан медаль хүртсэн баярт өдөр саяхан мэт боловч, хэдийн 17 намар өнгөрчээ. Түүхийг эргэн сануулбал одоогоос 17 жилийн өмнө буюу 2008 оны наймдугаар сарын 14-ний өдөр “Бээжин-2008” зуны XXIX олимпын наадмын жүдо бөхийн төрөлд -100 кг-ын жинд Булган аймгийн Сайхан сумын харьяат Найдангийн Түвшинбаяр түрүүлж, Монгол улсад анхны олимпын алтан медалийг авчирч байв. Тэр өдөр Монголчууд төв талбай дээрээ баяраа тэмдэглэж, Найдвар алддаггүй Найдангийн хүү гэх шинэ нэрийг түүнд өгч байлаа.

Энэ наадмаас монголчууд хоёр алт, хоёр мөнгөн медальтай ирж, анхны гэх тодотголтой олон амжилтын эхлэл тавигдаж байв. Тодруулбал, жүдо бөхийн төрлөөс анхны олимпын алтан медальтан 24 настайдаа төрж, Монголын спортын түүхийн шинэ хуудсыг нээж байсан бол, боксын хоёр тамирчин, буудлагын төрлөөс Монголын анхны олимпын мөнгөн медальт эмэгтэй тамирчин төрж байсан билээ. Тиймээс өнөөдөр бол Монголын спортынхон, тэр дундаа жүдо, буудлага, боксын тамирчдын хувьд баярт өдөрт юм. Түүгээр зогсохгүй Монголчуудын хувьд олимпын анхны алтан медаль авсан түүхэн өдөр тохиож байна.

Ачит төрийнхөө далбааг

Алдар нэртэйгээ өргүүлж

Алаг сайхан нүдэндээ баярын нулимстай зогссон

Та бидний итгэлийг алдаагүй

Тамирчны ялалт хямдхан олдоогүй...