АНУ-ын Тэнгисийн цэргийн “USS New Orleans” хөлөг онгоцонд гал гарсан байна. Уг хөлөг онгоц Японы Окинавагийн эрэг дээр зогсож байсан бөгөөд  ойролцоогоор 12 цаг шатжээ.

Хөлөг онгоцонд гарсан гал Лхагва гаригийн (2025.08.20) 16:00 цагт эхэлж, Пүрэв гаригийн өглөө унтраасан гэж АНУ-ын Тэнгисийн цэргийн мэдэгдэлд дурдсан. Гэсэн хэдий ч Японы Эргийн харуулын мэдэгдлээр галын эсрэг ажиллагаа өглөөний 09:00 цаг өнгөртөл үргэлжилсэн байна. Гал гарснаас улбаалан хоёр тэнгисийн цэрэг хөнгөн бэртэж, онгоцон дээр эмчилгээ хийлгэжээ. 

Мэргэжилтнүүдийн хэлснээр дайны хөлөг онгоцонд шатамхай материал их байдаг тул гал гарах нь маш аюултай. 2020 онд Сан Диегод “USS Bonhomme Richard” хөлөгт гал гарч, дөрвөн өдөр шатсан бөгөөд эцэст нь хэдэн тэрбум ам.долларын үнэтэй онгоцыг бүрмөсөн устгасан юм. Үүний дараа Тэнгисийн цэрэг галын аюулгүй байдлыг сайжруулах шинэ сургалт, шалгалт нэвтрүүлсэн.

Аналитикч Карл Шустерын хэлснээр, “USS New Orleans” галын улмаас дөрөв хүртэлх сарын турш ажиллагаанаас гарах магадлалтай бөгөөд Тэнгисийн цэрэг галын урьдчилан сэргийлэлт, тэмцэх арга хэмжээгээ дахин сайжруулах шаардлагатай байна гэжээ.