Зүүн Энэтхэгийн Баруун Бенгал мужийн Колката хотод сүүлийн 39 жилд тохиогоогүй их хэмжээний хур тунадас орсны улмаас 10 хүн амиа алджээ.

Амиа алдсан хүмүүсийн ес нь гудамжинд тогтсон усан дундуур явахдаа цахилгаанд цохиулсан байна.

Хотын болоод захын хорооллууд өнгөрсөн даваа гарагийн шөнөөс хойш ноцтой үерт автсан хэвээр байгаа бөгөөд орон сууц, бизнесийн байрууд, олон гол замууд үерт автсан хэвээр байгаа аж. Мөн галт тэрэгний үйлчилгээнд саатал гарчээ.

Энэ үер Баруун Бенгал мужийн хамгийн том, хамгийн олон хүнийг хамардаг жил бүрийн “Дурга Пужа” наадам болохоос хэдхэн хоногийн өмнө тохиосон нь нөхцөл байдлыг улам хүндрүүлж байгаа юм. Уг баяраар арван мянга гаруй хүн Хинду шашны бурхдын нэг Дургаг хүндэтгэн тахидаг байна.

Хорин дөрвөн цагийн дотор 251.4 мм хур тунадас орсон нь 1986 оноос хойш Колката хотод тохиосон хамгийн хүчтэй аадар бороо болж, мөн сүүлийн 137 жилд бүртгэгдсэн зургаа дахь их хэмжээний нэг өдрийн хур тунадас болжээ.

Энэтхэгийн цаг уурын албаны мэдээлснээр уг аадар нь Бенгалын хойгийн зүүн хойд хэсэгт үүссэн агаарын нам даралтын бүсийн нөлөөнөөс үүдэлтэй гэнэ.