4Охид бүсгүйчүүд хуруу хумсаа гоё сайхан байлгахын тулд огт амраахгүй будуулж байна. Ингэснээр эрүүл мэндийн хувьд хохирогч болох тохиолдол нэмэгджээ. Хумсны хавдар нь урт хугацаанд өөрт зовиур өгөхгүй нуугдмал хэв шинжтэй байдаг тул нимгэрч, өвчин орж эхэлсэн үед л эмэгтэйчүүд хумсаа үзүүлэхээр эмнэлэг барааддаг байна. Бид анхааруулах үүднээс "Доктор Үүр" гар сарвууны эмнэлгийн их эмч Очирпүрэвтэй ярилцлаа

-Хумсны хавдар гэж юу вэ?

Сүүлийн жилүүдэд хумсны хавдар огцом нэмэгдэж байна. Манай эмнэлэгт гэхэд л сард нэгээс хоёр тохиолдол бүртгэгддэг байсан бол, энэ тоо одоо 7 хоногт болж өөрчлөгдсөн байна. Хумсны хавдар нь Хумсны ар тал болон хурууны өндөгний хэсэгт хүрэхэд маш хүчтэй өвдөнө. Зарим тохиолдол хумсан дээр хөх туяатай толбо болон бор зураас гарч ирсэн байдаг. Тухайн үедээ хэсэг хүчтэй өвдөөд түүнийгээ төдийлөн тоохгүй яваад байдаг. Үзүүлэхээр тодорхой онош хэлдэггүй учраас хүмүүс нээх анзаардаггүй байх.

-Эмэгтэйчүүдийн дийлэнх нь хумсаа тогтмол будуулдаг болсон. Үүнээс болж эрүүл мэндийн эрсдэл, эмгэг үүсдэг үү?

Чанаргүй будаг болон гелэн лакийг хатаадаг гэрлээс болж, хумсны хавдар үүсч байна гэсэн судалгаа байдаг. Ингэж байнга будуулснаар урт хугацаандаа хумс гэмтэх шалтгаан болдог. Өмнө нь хүмүүс хумс гэмтэх, зовуурилахад төдийлөн санаа зовдоггүй байсан. Мөн хүмүүс хаана хандахаа сайн мэддэггүй байлаа. Одоо бол техник технологи хөгжсөн энэ үед хүмүүс түргэн оношлуулдаг болоод байна.

-Өдөрт дээрх тохиолдлоор хэчнээн хүн танай эмнэлэгт ханддаг вэ. Хэрвээ хумсны хавдартай болсон тохиолдолд эмчлэгдэх боломжтой юу?

Манай эмнэлэг долоо хоногтоо хумсны  асуудалтай хоёроос гурван хүн ханддаг. Хүмүүс хавдар гэхээр их хүндээр хүлээж авдаг. Энэ нь өөр эрхтэнд үсэрхийлэхгүй. Хагалгаанд орсноор бүрэн эдгэрэх боломжтой. Дараа нь хумсаа зөв арчилснаар хумс эргээд хэвийн ургана. Дээр хэлсэнчлэн аливаа зүйлийн хэм хэмжээ тунг тааруулах нь чухал.

Хумсаа огт битгий будуул гэж байгаа юм биш. Хүний хумс гурваас дөрвөн сарын дотор бүрэн шинэчлэгддэг байна. Хүмүүс гелэн лакийг удаан тогтох тусмаа сайн гэж ойлгодог. Угтаа бол гелэн будгийг 28 хүртэлх хоног байлгах нь зохистой. Мөн эсрэгээрээ ойр ойрхон арилгаж будах нь бас хумс гэмтэх шалтгаан болдог байна.

Тиймээс хумсаа будуулахдаа эрүүл ахуйн шаардлага хангасан, ариутгал халдваргүйжүүлэлт тогтмол хийдэг, мөн химийн орц найрлага багатай чанартай будагтай үйлчилгээний газрыг сонгож үйлчлүүлэхийг зөвлөж байна.