Нийслэл хотын дулааны шугам сүлжээний засвар, шинэчлэлийн ажил өнгөрсөн тавдугаар сарын 15-наас эхэлсэн. Энэ хүрээнд ирэх Даваа гариг буюу зургаадугаар сарын 15-наас 28-ны өдрүүдэд зарим байршлын хэрэглэгчдийн халуун усыг 14 хоногийн хугацаанд хязгаарлаж, төлөвлөгөөт засварын ажил хийхээр болжээ.

Тодруулбал, дараах бүс, хорооллуудын хэрэглэгчдийн халуун усыг түр хугацаагаар хязгаарлана. Үүнд:

• Жаргалан хотхон
• БНСУ-ын Элчин сайдын яам орчим
• Нархан хотхон
• Оддын хотхон орчим
• Олимп хотхон
• Баян Монгол хорооллоос 13 дугаар хороолол хүртэлх бүс
• Нарантуул худалдааны төв орчим
• Дүнжингарав хороолол
• Маршал таун хороолол
• Ривер Гарден хороолол орчим
• Их тэнгэр цогцолбор
• Сонжин Гранд зочид буудал орчим
• Алтан тэвш хороолол орчим
• АШУҮИС-ийн шинэ байр
• Амгалан орчмын хэрэглэгчид
• 15 дугаар хорооллын ЦТП-15 салаа
• Баянзүрх дүүргийн Нэгдсэн эмнэлэг орчим
• УДДТ-15-аас хангагддаг хэрэглэгчид

Энэ хугацаанд ДХ-1236–ДХ-1240 хоорондын 700 мм-ийн голчтой 156 хос метр дулааны шугамыг шинэчлэн солихоос гадна хэд хэдэн цэгт хаалт, таслах төхөөрөмж болон компенсатор шинэчлэх, урсгал засварын ажлуудыг гүйцэтгэх юм.

Тухайлбал, ИЗ-1217 цэгийн салааны 400 мм-ийн хаалт, ДХ-1463 цэгийн салааны 300 мм-ийн хаалт, ДХ-1240 цэгийн 700 мм-ийн компенсатор зэрэг тоноглолыг шинэчилж, бусад шаардлагатай засварын ажлыг хийхээр төлөвлөжээ.