Сонирхогчдын боксын насанд хүрэгчдийн дэлхийн аварга шалгаруулах тэмцээн ирэх есдүгээр сарын 4-14-ний өдрүүдэд Их Британийн Ливерпүүл хотод болно. 2025 оны ДАШТ-д оролцох Монгол Улсын Үндэсний шигшээ багийг ахлах дасгалжуулагч Ж.Энхтөр, дасгалжуулагч О.Батхүү, Ж.Еркин нар удирдан бэлтгэл сургуулилтад гарчээ. Одоогоор шигшээ багийн эрэгтэй тав, эмэгтэй таван тамирчин бэлтгэлд гарч эхэлсэн баг эрэгтэйчүүдийн хоёр жинд сорилт хийхээр болжээ.

Тэмцээний эрэгтэйчүүдийн 50 кг-ын жинд А.Баттулга, 55 кг-д Х.Билгүүнсайхан, 70 кг-д О.Бямба-Эрдэнэ, эмэгтэйчүүдийн 48 кг-ын жинд Л.Алтанцэцэг, 51 кг-д Б.Мөнгөнсаран, 54 кг-д О.Есүгэн, 57 кг-д М.Энхжаргал, 60 кг-д М.Намуун нар ДАШТ-д тулалдах эрх авлаа. 

Харин энэ сарын 20-ны өдөр эрэгтэйчүүдийн 60 болон 65 кг-ын жинд дөрвөн тамирчны дунд сорил явуулж, ялагч болсон тамирчин ДАШТ-д эх орноо төлөөлөн оролцоно.

Монголын боксчид насанд хүрэгчдийн ДАШТ-ээс нийт 16 медаль хүртсэн ба анхны медалийг 1982 онд гавьяат тамирчин Р.Отгонбаяр (57 кг-д мөнгө) хүртэж байсан бол отгон медальтан нь гавьяат тамирчин Б.Чинзориг (63.5 кг-д мөнгө), Б.Мишээлт (67 кг-д хүрэл) нар юм.

ДАШТ-ээс хос медальтай нь Хөдөлмөрийн баатар, гавьяат тамирчин П.Сэрдамба (Милан-2009-өөс алт, Баку-2011-ээс хүрэл), гавьяат тамирчин У.Мөнх-Эрдэнэ (Милан-2009-өөс хүрэл, Алматы-2013-аас хүрэл) нар билээ.

Тодруулахад 2025 онд боксын насанд хүрэгчдийн эрэгтэй, эмэгтэйчүүдийн ДАШТ-ийг анх удаа нэг дор зохион байгуулах гэж байна.