Зүүн Ази, Латин Америкийн хамтын ажиллагааны форум буюу "FEALAC"-ын Гадаад хэргийн сайд нарын 10 дахь уулзалтын хоёр дахь өдөр Ахлах албан тушаалтнуудын 24 дэх уулзалт боллоо. Тус уулзалтаар Гадаад хэргийн сайд нарын 10 дахь уулзалтын бэлтгэл ажлыг бүрэн хангаж, уулзалтын дүнгээр батлах “Улаанбаатарын тунхаглал” баримт бичгийн төслийг хэлэлцэж, эцэслэв.

Түүнчлэн "FEALAC"-ын Сангийн удирдах зөвлөл, улс төр, соёл, эдийн засаг, соёл, хүмүүнлэгийн ажлын хэсгүүд болон "FEALAC"-ын Цахим нарийн бичгийн даргын газар үйл ажиллагааныхаа үр дүнг тус бүр танилцуулж, ойрын ирээдүйд хэрэгжүүлэхээр төлөвлөж буй арга хэмжээнүүдийн талаар мэдээлэв. Гадаад хэргийн сайд нарын 10 дахь улзалт өнөөдөр Гадаад харилцааны яаманд болно.

2025-2027 оны хугацаанд Зүүн Азийн болон Номхон далайн бүсийн 16 улс, Латин Америкийн 20 улсыг нэгтгэдэг энэ форумыг Монгол Улс болон Бүгд Найрамдах Доминикан Улс хамтран даргална.