Эрдэнэт үйлдвэрийн дэргэдэх “Найрамдлын эрдэнэс” хүүхдийн зусланд хоолны хордлого гарсны улмаас өнөөдрөөс эхлэн үйл ажиллагаагаа түр зогсоолоо. Уг амралтын тавдугаар ээлжинд 322 хүүхэд хамрагджээ.

Амрагч хүүхдүүдийн гэдэс өвдөх, дотор муухайрах, халуурах зэрэг шинэ тэмдэг долоодугаар сарын 15-аас эхлэн илэрсэн байна. Өчигдөр Эрдэнэтийн халдвартын эмчийн үзлэгт 64 хүүхдийг хамруулж, таван хүүхдээс вирусын гаралтай ханиад байх магадлалтай гэж үзсэн байна. Мөн гурван хүүхдээс хоолны хордлого гэсэн шинж тэмдэг илэрчээ.

“Найрамдлын Эрдэнэс” зусланд Булган аймгийн ЭМГ-ын халдвар судлаач хоёр, улсын хяналтын байцаагч хоёр мэргэжилтэн ажиллаж, тандалт судалгаа, арчдас зэрэг ажлууд хийгдэж байна. Зусланд амарч байсан сурагчдаас гадна гурван багшийн гэдэс өвдөж, зовиурлах, бие сульдах, халуурах шинж тэмдэг илэрсэн тул үзлэгт хамруулжээ.

Өнөөдрийн 14:00 цагийн байдлаар “Найрамдлын Эрдэнэс” зусланд амарч байсан хүүхдүүдийг буцаахаар болсон байна. Тус зуслангийн тавдугаар ээлжийн амралт долоодугаар сарын 12-с эхэлсэн ба долоо хоногийн хугацаанд сагсан бөмбөгийн 3х3 өсвөрийн улсын аварга шалгаруулах “Эрдэнэт 2025” сургалт, тэмцээн багтсан байжээ.

Зуслангийн үйл ажиллагааг зогсоож, амрагч хүүхдүүдийг эцэг, эхэд нь хүлээлгэн өгч эхэллээ. Мөн зургаадугаар ээлжийн амралт долоодугаар сарын 19-д эхлэх эсэх нь тодорхойгүй байна.